Kosinn varaforseti hafréttardómsins

Tómas H. Heiðar var á föstudag kjörinn varaforseti Alþjóðlega hafréttardómsins til næstu þriggja ára. Albert Hoffmann frá Suður-Afríku var kjörinn forseti dómsins.

Tómas var kjörinn dómari við Alþjóðlega hafréttardóminn á fundi aðildarríkja hafréttarsamnings Sameinuðu þjóðanna sumarið 2014 og er kjörtímabil hans níu ár, til haustsins 2023.

Undanfarin þrjú ár hefur Tómas gegnt embætti forseta deildar dómsins fyrir fiskveiðideilur og jafnframt verið formaður nefndar dómsins sem annast kynningarmál. Hann á sæti í sérdómi Alþjóðlega hafréttardómsins sem fer með deilumál Máritíus gegn Maldív-eyjum er varðar afmörkun hafsvæða milli ríkjanna á Indlandshafi.

Tómas er jafnframt forstöðumaður Hafréttarstofnunar Íslands í aukastarfi og á sæti í stjórn Ródos-akademíunnar í hafrétti sem efnir til alþjóðlegs námskeiðs á hverju ári. Hann gegndi áður starfi þjóðréttarfræðings utanríkisráðuneytisins í tæp 20 ár. aij@mbl.is