Landeldisstöð Samherja „raunhæf lausn“

Samherji og Norðurál hafa skrifað undir viljayfirlýsingu um kaup Samherja á lóð og byggingum Norðuráls við Helguvík.

Sjávarútvegsfyrirtækið hefur í hyggju að hefja laxeldi á landi, svokallaða landeldisstöð, og nýta til þess byggingar Norðuráls sem upphaflega átti að nota fyrir álver en ekki fékkst raforka fyrir.

Þetta segir Sólveig Kr. Bergmann, upplýsingafulltrúi Norðuráls, sem vill ekkert tjá sig um mögulegt kaupverð. „Næstu vikur fara í að kanna hagkvæmnina og möguleikana til að byggja landeldisstöð,“ segir hún en Fréttablaðið greindi frá málinu í morgun og vitnaði í heimildir. Búist er við því að niðurstaða úr frumathugun verði tilbúin fyrir áramót. 

Hafa leitað að góðri lendingu 

Að sögn Sólveigar var nýlega skrifað undir viljayfirlýsinguna. Norðurál hafði farið fram á það við bæjarstjórnir Reykjanesbæjar og Suðurnesjabæjar að þær rýmkuðu fyrir leyfilega nýtingu á svæðinu við Helguvík. „Við höfum undanfarna mánuði verið að leita að góðri lendingu og að finna lausnir fyrir aðila sem henta best“ segir hún og bætir við að Samherji hafi sett fram lausn sem „virkaði raunhæf“. „Fólk hefur nálgast okkur með ýmsar hugmyndir en þetta hefur gengið lengst.“

Sólveig kveðst vona að það finnist á endanum lausn og nýting sem kemur öllum vel, þar á meðal íbúum í nágrenninu. 

Samherji er þegar með fiskeldisstöðvar í Grindavík og á Vatnsleysuströnd.

• 2 blogg um fréttina

Bloggað um fréttina

• Ómar Ragnarsson: Af hverju er landeldi ekki víðar?
• Jón Snæbjörnsson: það er drift í Samherja ....