„Sérstaklega stór og myndarlegur“

Bjarni Ólafsson AK, Börkur NK og Beitir NK, skip Síldarvinnslunnar, hafa á stuttum tíma landað myndarlegum afla í Neskaupstað og hefur kolmunninn og síldin verið fyrirferðamikil.

Í nótt kom Bjarni Ólafsson AK til hafnar með 1.835 tonn af kolmunna og er það þriðji kolmunnafarmurinn sem skipið landar á skömmum tíma, að því er segir í færslu á vef Síldarvinnslunnar. „Þessi veiðiferð gekk afskaplega vel og við fengum aflann um 60 mílur beint út af Norðfirði. Það er stutt að fara og þetta er eins þægilegt og það getur verið,“ er haft eftir Runólfi Runólfssyni skipstjóra.

Stærsta holið 560 tonn

Það tók aðeins fimm hol að ná aflanum segir Runólfur sem þykir ánægjulegt að geta veitt kolmunnann í íslenskri lögsögu, en það var 2018 sem það var hægt að ná í kolmunnann í einhverjum mæli í lögsögunni síðast, að sögn Runólfs.

Bjarni Ólafsson AK. Ljósmynd/Smári Geirsson - Síldarvinnslan

„Stærsta holið var 560 tonn og það minnsta um 200 tonn. Það er bara dregið yfir daginn. Við köstum klukkan hálfsjö á morgnana og drögum í tíu og hálfan tíma. Það er látið reka yfir nóttina því þá gengur fiskurinn upp í sjó og dreifir sér. Hér er um að ræða stóran og fallegan kolmunna, fiskurinn er í reynd ótrúlega fallegur. Nú er að fjölga skipum á miðunum. Víkingur og Venus eru að hefja kolmunnaveiðar og Börkur og Beitir eru farnir að veiða kolmunna á milli þess sem þeir veiða síld.“

Náði kolmunna með síldartrollinu

Strax og lokið var við að landa um þúsund tonnum af síld úr Beiti NK í Neskaupstað í gær var hafist handa við að landa 630 tonnum af síld og 250 tonnum af kolmunna úr Berki NK sem náði einu holi af kolmunna með síldartrollinu.

„Þetta er sérstaklega stór og myndarlegur kolmunni sem þarna fæst. Við höfum ekki séð svona stóran kolmunna í mörg ár. Við munum ljúka við að landa í kvöld og þá verður örugglega strax haldið til kolmunnaveiða á ný,“ er haft eftir Hjörvari Hjálmarssyni skipstjóra á Berki í færslunni.

Beitir NK snéri aftur til veiða í gærkvöldi og er gert ráð fyrir að hann veiði kolmunna fram á sunnudag, en þá mun hann hefja síldarveiðar og koma til löndunar á mánudag.

Börkur NK, skip Síldarvinnslunnar. mbl.is/Þorgeir Baldursson

• Blogga um frétt