Ráðlegging Hafró ákveðin vonbrigði

Hafrannsóknastofnun mun að óbreyttu leggja til að engar loðnuveiðar verði á vertíðinni 2020/2021. Ráðleggingin er sögð byggja á gildandi aflareglu, en þetta mun vera þriðja vertíðin sem loðnuveiðar eru ekki ráðlagðar, en stofninn verður metinn að nýju í leiðangri í janúar og febrúar.

Þeir útgerðarmenn sem Morgunblaðið náði tali af í gær voru bjartsýnir á að það endurmat myndi skila árangri. „Fréttir af andláti loðnustofnsins eru stórlega ýktar,“ segir Gunnþór Ingvason, framkvæmdastjóri Síldarvinnslunnar, í samtali við Morgunblaðið. Benti Gunnþór á að stofnunin hafi eingöngu komið úr einum leiðangri og geti ekki lagt til loðnukvóta út frá honum.

Þá hafi leiðangurinn mælt næsthæstu mælingu á ungloðnu frá upphafi mælinga. „Það er því mjög bjart yfir loðnustofninum,“ segir hann. „Við höfum enga ástæðu til að ætla annað en að loðnan sé þarna og það eigi bara eftir að ná utan um að mæla hana,“ segir Gunnþór og bætir við í umfjöllun um þetta mál í Morgublaðinu í dag, að nú þurfi að bretta upp ermar og skipuleggja næstu leiðangra.

Hann segir því algjöran óþarfa að tala um mögulegan tekjumissi vegna engra loðnuveiða. „Þetta eru auðvitað ákveðin vonbrigði en hefur gerst oft áður. Við erum bara jákvæðir.“