Sökk í höfninni á Stöðvarfirði

Stálbáturinn Drangur ÁR 307 sökk í höfninni á Stöðvarfirði á áttunda tímanum í morgun. Á annan tug björgunarsveitarmanna er við störf í höfninni ásamt öðrum viðbragðsaðilum. 

Það voru sjómenn sem voru á leið út á sjó sem sáu bátinn sökkva upp úr klukkan sjö í morgun og höfðu strax samband við Neyðarlínuna. 

Að sögn Davíðs Más Bjarnasonar, upplýsingafulltrúa Slysavarnafélagsins Landsbjargar, voru björgunarsveitir á Austurlandi kallaðar út skömmu fyrir hálfátta í morgun vegna málsins og er nú á annan tug björgunarsveitarmanna að störfum í höfninni ásamt slökkviliði Fjarðabyggðar og lögreglu. Unnið er að því að hreinsa olíu- og lausamuni sem hafa flotið frá bátnum að sögn Davíðs. 

Varðskipið Þór er komið á vettvang og tekur áhöfn þess þátt í aðgerðum samkvæmt upplýsingum frá Landhelgisgæslunni.

Ólafur Helgi Pétursson sjómaður sá bátinn sökkva er hann var á leið út á sjó í morgun. Hann segir að aðeins stýrishúsið og stefnið standi upp úr. 

• Blogga um frétt