Togari og kvóti fylgir kaupunum á Bergi ehf.
Setja bókamerki
Útgerðarfélagið Bergur-Huginn ehf., sem er að fullu í eigu Síldarvinnslunnar, mun festa kaup á útgerðarfélaginu Bergi ehf. í Vestmannaeyjum samkvæmt samningi sem undirritaður var á laugardag.
Aflaheimildir Bergs ehf. eru 0,36% af heildarkvóta á fiskveiðiárinu 2020-2021 eða sem nemur 1.514 þorskígildistonnum, að því er fram kemur á vef Síldarvinnslunnar, en kaupin eru gerð með fyrirvara um samþykki samkeppniseftirlitsins.
Þá segir að félaginu fylgi togarinn Bergur VE 44 sem smíðaður var hjá Karstensens Skibsværft í Skagen í Danmörku árið 1998 og hefur verið í eigu fyrirtækisins frá árinu 2005. Togarinn er 569 brúttótonn að stærð
Saga félaganna í Vestmannaeyjum er rakin á vef Síldarvinnslunnar:
„Segja má að saga Bergs-Hugins og Bergs sé samofin en upphaf hennar má rekja til ársins 1954 þegar vélbáturinn Bergur VE 44 var keyptur til Vestmannaeyja, en þá var Bergur hf. stofnað af þeim Kristni Pálssyni og Magnúsi Bergssyni tengdaföður hans. Árið 1972 var útgerðarfélagið Bergur-Huginn stofnað en að því stóðu útgerðarfélögin Bergur hf. og Huginn hf. og var megintilgangur hins sameinaða félags að festa kaup á skuttogara og hefja útgerð hans. Þeir bræður Kristinn og Sævald Pálssynir, útgerðarmenn frá Þingholti í Vestmannaeyjum, renndu hýru auga til skuttogaraútgerðar og fengu mág sinn, Guðmund Inga Guðmundsson útgerðarmann Hugins, til liðs við sig og saman stofnuðu þeir útgerðarfélagið Berg-Hugin ehf. sem síðan festi kaup á skuttogaranum Vestmannaey.
Þegar togarinn var keyptur var ákveðið að gera Berg út áfram og var hann gerður út á net, troll og loðnu en skipstjóri á honum var Sævald Pálsson. Árið 1983 var ákveðið að skipta upp félaginu Bergi-Hugin en Sævald dró sig út úr því og hélt áfram útgerð Bergs.
Árið 2012 festi Síldarvinnslan hf. kaup á Bergi-Hugin ehf. og eru skip félagsins, Vestmannaey og Bergey, gerð út frá Vestmannaeyjum. Magnús Kristinsson stýrði daglegum rekstri Bergs-Hugins til ársins 2017, eins og hann hafði gert frá stofnun félagsins, en þá tók Arnar Richardsson tengdasonur Magnúsar við sem rekstrarstjóri. Elfa Ágústa, dóttir Magnúsar, starfar á skrifstofu Bergs-Hugins og er hún fjórði ætliðurinn sem starfar hjá fyrirtækinu.“
„Sjaldan orðlaus en ég er það í þessu tilfelli“
Kaup á Grænlandi og Íslandi skoðuð 1867
Kölluðu til lögreglu á mótmæli Eflingar í Kringlu
„Ég á 10-15 vini sem eru búnir að missa allt“
Vara við hættulegum vindum í Los Angeles