Aukinn kvóti en engar veiðar

Heimildir íslenskra skipa til veiða á túnfiski hafa aukist síðustu ár, en hins vegar hafa þau ekki stundað þessar veiðar síðan haustið 2016. Jóhanna Gísladóttir GK, skip Vísis hf. í Grindavík, var á túnfiskveiðum í þrjú ár.

Árið 2014 veiddust 122 fiskar eða 22,2 tonn úr sjó, 2015 155 fiskar eða 27 tonn og 2016 veiddust 17 fiskar eða 3,1 tonn. Sjá má á vef Fiskistofu að íslensk skip hafa fengið nokkra túnfiska sem meðafla í ár og landað alls 839 kílóum.

Að sögn Péturs H. Pálssonar, framkvæmdastjóra Vísis, gengu veiðarnar að mörgu leyti ágætlega, en gáfu þó ekki mikið af sér og var því hætt. Fyrirtækið er enn með leyfi til þessara veiða. Pétur segir að kannaðir hafi verið möguleikar á að fá frystiskip hingað til lands til að nýta kvóta Íslendinga undir íslenskum fána, en ekkert hafi orðið af því. Túnfiskurinn er veiddur á línu og eru veiðar heimilaðar frá 1. ágúst til 31. desember.

Þá segir Pétur í Morgunblaðinu í dag, að það hafi hamlað þessum veiðiskap á sínum tíma að þröngur gluggi var til að koma túnfiski úr veiðiskipi, sem ekki var búið frystitækjum, í flug til Japans. Þá hefur verð á túnfiski lækkað á mörkuðum í ár í Japan í kjölfar kórónuveirufaraldursins.