Fiskeldi Austfjarða hefur fengið lífræna vottun samkvæmt reglugerð Evrópusambandsins. Tryggir þetta fyrirtækinu eftirsóttan markað fyrir hágæða laxaafurðir í Evrópu.

Aðeins fjögur önnur fyrirtæki í heiminum standast þessa vottun enda gilda um hana afar ströng skilyrði, að sögn Jónatans Þórðarsonar, þróunarstjóra Fiskeldis Austfjarða. Þannig má ekki nota lyf eða önnur efni og aðeins hágæða fóður og aðrar vistvænar aðferðir við eldi laxins. Sem dæmi má nefna að litarefni fóðursins er framleitt úr brúnþörungum og er það jafnframt afar öflugt andoxunarefni úr náttúrunni. Raunar eru öll hráefni í fóðrið lífrænt vottuð. Jónatan segir að vissulega sé meiru til kostað en í hefðbundnu sjókvíaeldi en á móti fáist mun hærra verð fyrir afurðirnar.

Allt selt fyrirfram

Fiskeldi Austfjarða selur megnið af framleiðslu sinni til verslana Whole Foods-sælkerakeðjunnar í Bandaríkjunum. Það er gert með samningum til langs tíma þar sem verðið er ákveðið fyrirfram. Tekur söluverðið því ekki þeim miklu sveiflum sem verið hafa á heimsmarkaðsverði á laxi undanfarin misseri. Jónatan segir að kröfur í lífrænni vottun ESB séu svipaðar og þær kröfur sem Whole Foods gerir en þó ekki eins. Segir hann að vottunin skapi tækifæri fyrir fyrirtækið í Evrópu og víkki þannig markaðssvæðið út. Þar sem svo lítið framboð sé á lífrænt vottuðum laxaafurðum og varan eftirsótt vegna gæðanna sé hægt að selja laxinn fyrirfram á góðu verði. Það hafi þegar verið gert, bæði til Evrópu og Japan, auk Bandaríkjanna.

Vottunin nær til sjókvíaeldis Fiskeldis Austfjarða í Berufirði og Fáskrúðsfirði og seiðastöðvarinnar Rifóss í Kelduhverfi.

Tengdar fréttir

Fiskeldi

Telur lúsina sameiginlega áskorun

• Lús smitar út frá kvíum í villta laxa
• Met sett í vinnslunni í október
• Rannsaka mikinn seiðadauða í Fáskrúðsfirði
• 2024 líklegast metár eldisafurða

» Fleiri tengdar fréttir