Lagarfoss vélarvana og verður dreginn í höfn

„Varðskipið Þór er nú á leið í átt að flutningaskipinu Lagarfossi sem varð vélarvana um 230 sjómílur suðvestur af Garðskaga í gær,“ segir í tilkynningu frá Landhelgisgæslunni.  

Eimskip tilkynnti Landshelgisgæslunni í gær um bilunina í Lagarfossi og spurðist fyrir um hvort varðskipið Þór gæti tekið Lagarfoss í tog.  

Segir í tilkynningu Landhelgisgæslunnar að þegar ljóst varð að viðgerð í Lagarfossi hafði ekki borið árangur var áhöfnin á varðskipinu Þór kölluð út. 

„Varðskipið Þór lét úr höfn í Reykjavík á öðrum tímanum í nótt og búast má við að það verði komið að Lagarfossi að morgni þriðjudags. Taug verður þá komið á milli skipanna og gera má ráð fyrir að drátturinn taki allt að tvo sólarhringa. Ætla má að skipin verði komin til hafnar í Reykjavík á gamlársdag,“ segir í tilkynningunni.

Varðskipið Þór. Árni Sæberg

• Blogga um frétt