Samdráttur í kolmunnaveiðum í ár

Fyrstu skipin lögðu af stað til kolmunnaveiða suðaustur af Færeyjum strax aðfaranótt 3. janúar. Í gær voru átta skip komin á miðin eða á leiðinni þangað; Beitir NK, Börkur NK, Bjarni Ólafsson AK, Hoffell SU, Venus NS, Víkingur AK, Jón Kjartansson SU og Guðrún Þorkelsdóttir SU.

Fréttir af aflabrögðum hafa ekki verið sérstakar síðustu daga, en útgerðin vonast til að ná afla á Færeyjamiðum næstu vikur áður en kolmunninn gengur sunnar. Þegar líður á febrúar er veiðisvæði íslensku skipanna á alþjóðlegu hafsvæði vestur af Bretlandseyjum.

Alþjóðahafrannsóknaráðið (ICES) leggur til að kolmunnaafli 2021 fari ekki yfir 929 þúsund tonn, en ráðgjöf síðasta árs var 1,2 milljón tonn og er því um að ræða 20% lækkun á ráðgjöf. Hins vegar var í haust áætlað að alls yrði kolmunnaaflinn 2020 tæplega 1,5 milljón tonn sem er 27% umfram ráðgjöf, að því er fram kemur í Morgunblaðinu í dag.