Hagnaður af rekstri FISK Seafood og dótturfélaga á síðasta ári nam um þremur milljörðum króna. Þá voru skuldir lækkaðar auk þess sem fjárfest var m.a. í tækjabúnaði og viðhaldi, að því er fram kemur í pistli eftir Friðbjörn Ásbjörnsson, framkvæmdastjóra félagsins, á vef fyrirtækisins.

Þar segir framkvæmdastjórinn þörf á að marka stefnu og hefja undirbúning að frekari uppbyggingu. Bendir hann á að togarinn Málmey og frystiskipið Arnar nálgast „þann aldur að þörf er á endurnýjun“.

Jafnframt segir Friðbjörn þörf á að hefja undirbúning „mikillar uppbyggingar og endurnýjunar húsakosts“ á Sauðárkróki, en á árinu seldi félagið tvær eignir á Grundarfirði og fasteign sem áður hýsti frystihúsið á Hofsósi.

„Framundan eru því umtalsverðar fjárfestingar, m.a. með niðurrifi húsakosts og nýbyggingum, nýjum tækjabúnaði, t.d. fyrir svokallaða Skinpack-framleiðslu, o.fl. Með nýjum skipum og endurnýjuðu frystihúsi munu aðstæður okkar til veiða og vinnslu verða í allra fremstu röð hér á landi,“ skrifar framkvæmdastjórinn.

Til stendur að afhenda sveitarfélaginu á Skagaströnd án endurgjalds svokallað stjórnsýsluhús sem nú hýsir Vinnumálastofnun og skrifstofur sveitarfélagsins. Einnig verður afhent gamla síldarvinnslan og rækjuvinnslan.

Tengdar fréttir

FISK Seafood

Höfnin stendur samkeppnishæfni fyrir þrifum

• Kaupa 100 tonna kvóta af Saltveri
• 300 milljóna króna afla landað á Sauðárkróki
• Ný ytri höfn forsenda uppbyggingar
• Hafa landað 485 tonnum á Sauðárkróki

» Fleiri tengdar fréttir