FISK Seafood hefur gert samning um kaup á útgerðarfélaginu Ölduósi ehf. á Höfn í Hornafirði fyrir ríflega 1,8 milljarða króna með fyrirvara um samþykki Samkeppniseftirlitsins. Kaupunum fylgir krókaaflamarksbáturinn Dögg SU 118 og um 700 þorskígildistonn í aflaheimildum, að því er fram kemur í tilkynningu á vef FISK Seafood.

„Með kaupunum styrkir útgerð FISK Seafood rekstur sinn og hlutdeild í bolfiskvinnslu félagsins. Þorskveiðikvótinn eykst um tæplega 5% og gera má ráð fyrir að viðbótaraflinn samsvari tveggja til þriggja vikna afkastagetu landvinnslu FISK Seafood á Sauðárkróki og Snæfellsnesi,“ segir í tilkynningunni.

Kemur tilkynningin í kjölfar frétta af stórfelldum áformum fyrirtækisins um frekari uppbyggingu á Sauðárkróki.

Frétt af mbl.is

Boðar miklar fjárfestingar

Færist til Skagafjarðar

Dögg hefur verið gerð út frá Stöðvarfirði og kemur fram í tilkynningunni að seljendur bátsins muni ljúka þessu fiskveiðiári með áhöfn sinni áður en afhending hins selda fer að fullu fram.

„Með þessum viðskiptum er FISK Seafood að fikra sig inn í smábátaútgerð á línu og skak og ef vel tekst til munum við halda áfram að byggja okkur upp á því sviði. Vertíðarbátarnir yrðu kærkomin viðbót við það aukna líf sem höfnin hér á Sauðárkróki hefur öðlast á undanförnum árum og þetta fyrsta skref með kaupunum á Dögg verður strax mikil styrking fyrir landvinnsluna og verðmætin sem hún er að skapa á hverjum degi,“ er haft eftir Friðbirni Ásbjörnssyni, framkvæmdastjóra fyrirtækisins.

Dögg SU, sem smíðuð var hjá Trefjum árið 2007, er tæplega 15 brúttótonn, 11,5 brúttórúmlestir og ríflega 11 metrar að lengd.

Vigfús Vigfússon hefur til þessa gert út bátinn Dögg SU 118. mbl.is/Albert Eymundsson

Tengdar fréttir

FISK Seafood

Samfélagssporið jókst um 20% milli ára

• Höfnin stendur samkeppnishæfni fyrir þrifum
• Kaupa 100 tonna kvóta af Saltveri
• 300 milljóna króna afla landað á Sauðárkróki
• Ný ytri höfn forsenda uppbyggingar

» Fleiri tengdar fréttir

• Blogga um frétt