Rækjuverksmiðjan Kampi á Ísafirði hefur fengið greiðslustöðvun til næstu þriggja vikna.

Frá þessu er greint á vestfirska fréttavefnum bb.is. 

Haft er eftir Jóni Guðbjartssyni stjórnarformanni að tíminn verði nýttur til að vinna að lausn fjárhagsvanda fyrirtækisins.

Eigendur muni leggja fyrir kröfuhafa áætlanir sínar og fái þær brautargengi verði sótt um lengri greiðslustöðvun, til tveggja eða þriggja mánaða. Að sögn Jóns munu hluthafar leggja fram fé í þessum aðgerðum.

Óvænt verri fjárhagsstaða

Tekið er fram á bb.is að í síðasta mánuði hafi óvænt komið í ljós önnur og verri fjárhagsstaða en fram hafði komið áður í bókhaldi og ársreikningum félagsins.

Unnið hafi verið að því með nýjum endurskoðanda að komast til botns í því, en um háar fjárhæðir sé að ræða.

Hjá fyrirtækinu starfa 42 starfsmenn. Birnir ehf. er stærsti eigandi félagsins með um 70% hlutafjár og félagið Hvetjandi á um 10%.

Tengdar fréttir

Kampi rækjuvinnsla

Kampi kærir bókhaldsbrellur til lögreglu

• Ætluðu að loka á rafmagnið
• Vísað úr stjórn og sagt upp störfum
• „Auðvitað hefur fólk áhyggjur af þessu“
• Bókhald byggt á skáldskap

» Fleiri tengdar fréttir

• Blogga um frétt