Hafrannsóknastofnun hefur leiðrétt loðnuráðgjöf sína eftir endurútreikninga þar sem villa kom í ljós. Er ráðgjöf stofnunarinnar nú 61 þúsund tonn í stað 54 þúsund tonna sem greint var frá fyrir helgi, en þar á undan hafði ráðgjöfin verið upp á 22 þúsund tonn.

Í tilkynningu á vef Hafrannsóknastofnunar kemur fram að við endurútreikninga loðnumælinga samkvæmt gæðaferlum hafi komið í ljós villa við úrvinnslu á bergmálsmælingum á stærð hrygningarstofns loðnu. Niðurstaða þeirrar mælingar hækkaði um 19 þúsund tonn, eða upp í 338 þúsund tonn. Þýðir þetta að leiðrétt loðnuráðgjöf fyrir vertíðina 2020/21 er nú 61 þúsund tonn.

Grunnur ráðgjafarinnar byggir á mati á stærð hrygningarstofns loðnu sem byggir á meðaltali tveggja mælinga. Annars vegar á niðurstöðum bergmálsleiðangurs í desember og hins vegar á samanlöðum niðurstöðum tveggja bergmálsleiðangra í janúar.

Fyrri mælingin í janúar, upp á samtals 144 þúsund tonn, var takmörkuð að því leyti að engar mælingar voru gerðar í Grænlandssundi sökum hafíss, segir á vef stofnunarinnar. Enn fremur var magn loðnu á austurhluta svæðisins langt undir því sem mældist í desember. Seinni mælingin í janúar var á afmörkuðu svæði úti fyrir Austfjörðum og þar mældust um 338 þúsund tonn.

Fram kemur að yfirgnæfandi líkur séu á að loðnan fyrir austan land hafi ekki verið hluti af mælingunni fyrr í mánuðinum og því eru þessar tvær mælingar teknar saman og gefur það mat upp á 482 þúsund tonn.

Tengdar fréttir

Loðnuveiðar

Töf á mælingu vegna viðgerðar

• Lítið sást til loðnunnar
• Ekkert hefur sést til loðnunnar
• Enga stund að éta 10 milljónir loðna
• Kanna útbreiðslu loðnunnar í desember

» Fleiri tengdar fréttir

• Blogga um frétt