Línubáturinn Fjölnir GK hefur verið kyrrsettur við bryggju í Grindavík eftir að einn úr áhöfninni fékk jákvæða svörun úr sýnatöku fyrir Covid-19. Níu skipverjar eru um borð og þar af eru þrír í einangrun inni í klefum.

Þetta staðfestir skipstjóri Fjölnis, Aðalsteinn R. Friðþjófsson, í samtali við mbl.is. Fréttablaðið greindi fyrst frá.

Skipverjinn var nýlega kominn heim frá útlöndum og fór því í tvær sýnatökur. Sú fyrsta reyndist neikvæð en sú síðari sýndi jákvæða svörun. Hann mætti þó til starfa áður en hann fékk niðurstöðu úr síðari skimun og rauf þar með sóttkví. Skipið átti að sigla úr höfn í kvöld.

Aðalsteinn segir að hann hafi fengið niðurstöður úr síðari skimun á nánast sama augnabliki og hann mætti um borð. Þá var hann þó búinn að heilsa þremur vinnufélögum sínum og eru þeir nú í einangrun í skipinu. Hinir sex úr áhöfninni sem voru mættir um borð þegar niðurstaðan barst eru í sóttkví um borð. Skipverjinn fer í mótefnamælingu í fyrramálið.

„Við bíðum bara niðurstöðu um hvort þetta sé gamalt smit eða ekki hjá honum. Gildin eru víst há hjá honum þannig að það eru miklar líkur á því að þetta sé gamalt smit. Hann á að mæta strax klukkan átta í fyrramálið og þeir telja að það taki 1-2 klukkutíma að fá niðurstöðu frá því hann mætir. Þá vitum við meira,“ segir Aðalsteinn, sem er sjálfur í fríi.

Tengdar fréttir

Kórónuveiran Covid-19

„Áfall fyrir bæjarfélagið“

• Covid-19 aftur á skrið
• „Hefur ótrúleg áhrif á líf fólks“
• Landsvirkjun selur höfuðstöðvarnar
• Smitum fjölgar: Hópsýking kom upp á Landakoti

» Fleiri tengdar fréttir

• Blogga um frétt