Mokveiði vestast í Víkurálnum

Það er mikið af þorski vestast í Víkurálnum og hefur víðar verið góð veiði ef marka má Eirík Jónsson, skipstjóra á ísfisktogaranum Akurey AK. Togarinn kom til hafnar í Reykjavík í gærmorgun með um 180 tonna afla.

„Við hófum veiðar í þessum túr á utanverðu Látragrunni og þaðan unnum við okkur norður með kantinum. Við fengum mokveiði af þorski á horninu vestast í Víkurálnum. Þetta var stór og góður fiskur, fjögurra til fimm kílóa, og með þorskinum fengum við dálítið af ýsu og ufsa,“ er haft eftir skipstjóranum á vef Brims.

„Við fórum síðan suður á Reykjanesgrunn en þar höfðu togarar verið í góðri ufsaveiði. Síðan vörðum við síðustu tæpu tveimur dögunum í Skerjadjúpinu. Þar fengum við ágætan djúpkarfaafla í síðustu tveimur birtingunum. Þá var túrinn búinn og það vantaði ekki nema nokkur kör upp á fullfermi,“ segir Eiríkur.

Akurey AK kom til hafnar í gærmorgun. Ljósmynd/Brim

Himinn og haf á milli

Heildarafli Akureyjar nam 6 þúsund tonnum á síðasta ári og kveðst Eiríkur ánægður með árangurinn. „Frátafir frá veiðum voru miklar. Við vorum um tíu daga frá vegna bilunar í stýri í upphafi ársins og svo bættust tveir mánuðir við á meðan verið var að setja niður þriðju togvinduna. Það er framkvæmd sem á eftir að borga sig.“

„Það er ekki bara í tregveiði sem tvö troll, sem veitt er í í einu, hafa sannað sig. Ég get nefnt karfaveiðar sem dæmi. Þar er himinn og haf á milli þess að nota eitt eða tvö troll samtímis. Fyrir þessa breytingu hefði mátt þakka fyrir fjögur til fimm tonn af djúpkarfa á dag en núna getum við tvöfaldað þann afla.“

• Blogga um frétt