„Ég átti 20 mínútur eftir ólifaðar“

„Ég lifði þetta af í kröppum dansi og fékk fótinn í bónus,“ segir Björgvin Hreinsson, 57 ára trillusjómaður á Vopnafirði.

Miðvikudagurinn 18. mars í fyrra reyndist örlagaríkur í lífi Björgvins. Þann dag var hann í hlutverki hafnsögumanns þegar flutningaskipið Samskip Hoffell sigldi frá Vopnafirði. Þegar skipið var komið á lóðsstöð úti á firðinum bjóst Björgvin til að fara um borð í björgunarskipið Sveinbjörn Sveinsson, eins og tíðkast þar um slóðir.

Þegar Björgvin var um það bil að koma sér um borð í Sveinbjörn Sveinsson „kom óvænt kvika við það“, eins og það er orðað í skýrslu rannsóknarnefndar samgönguslysa. „Skipið féll hratt niður og seig aðeins frá SH en skall síðan utan í það. Við þetta varð hægri fótur hafnsögumannsins á milli skipanna með þeim afleiðingum að hann fótbrotnaði mjög illa,“ segir í skýrslunni. „Skipverjar á björgunarskipinu settu snarvöndul fyrir ofan áverkana á lærinu sem skipti sköpum til að lágmarka afleiðingar slyssins,“ segir þar ennfremur.

Löng bið á sjúkrahúsinu

Björgvin lýsir atvikinu svo í samtali í Morgunblaðinnu í dag: „Það virtist allt vera eðlilegt en svo þegar ég er að stíga um borð í björgunarskipið kemur eitthvert ólag á það og ég bara náði ekki að forða mér. Þegar skipið kom til baka náði það í vinstri fótinn á mér. Með einhverju harðfylgi tókst mér að henda mér úr stiganum og yfir á björgunarskipið. Ég hékk svo utan á því þangað til ég heyrði að skipstjórinn gargaði á strákana að þeir yrðu að ná mér. Ég hélt að skipið væri að koma á mig aftur og varð hræddur en með hjálp skipverjanna tókst mér að sveifla mér aftur inn fyrir.“