Gréta María til Brims

Gréta María Grétarsdóttir hefur verið ráðin í stöðu framkvæmdastjóra nýsköpunar, samfélagsábyrgðar og fjárfestatengsla hjá útgerðarfyrirtækinu Brimi hf., að því er fram kemur í fréttatilkynningu.

Þar segir að Gréta María, sem lauk meistaragráðu í verkfræði frá Háskóla Íslands 2008, hafi víðtæka reynslu úr atvinnulífinu, en hún gegndi stöðu framkvæmdastjóra hjá Krónunni þar til í vor og áður stöðu fjármálastjóra hjá Festi. Þá hlaut hún Viðskiptaverðlaun Viðskiptablaðsins og Frjálsrar verslunar árið 2019 fyrir áherslu á umhverfis- og lýðheilsumál í störfum sínum hjá Krónunni.

Gréta María býr einnig að reynslu úr bankakerfinu og upplýsingatæknigeiranum. Hún hefur setið í fjölmörgum stjórnum og einnig sinnt kennslu við verkfræðideild Háskóla Íslands og við MPM-nám í verkefnastjórn.

Sókn í umhverfismálum

„Það er ánægjulegt að fá Grétu Maríu til liðs við okkur. Reynsla hennar og áherslur munu hjálpa okkur að efla starfsemi okkar og festa Brim í sessi sem leiðandi sjávarútvegsfyrirtæki“ er haft eftir Guðmundi Kristjánssyni forstjóra Brims í tilkynningunni en hann var nýlega endurráðinn til félagsins.

Frétt af mbl.is

Guðmundur endurráðinn forstjóri Brims

„Ég er mjög ánægð að vera komin til Brims og hlakka til að taka þátt í áframhaldandi uppbyggingu á einu af öflugustu sjávarútvegsfyrirtækjum landsins. Brim hefur verið leiðandi í umhverfismálum og við munum halda áfram að starfa í sátt við umhverfið og samfélagið. Við munum einnig leggja okkar af mörkum við að styðja við verðmætasköpun í bláa hagkerfinu með öflugri rannsóknar og þróunarvinnu,“ segir Gréta María.

• Blogga um frétt