Ákveðið hefur verið að skrá Síldarvinnsluna á íslenska hlutabréfamarkaðinn og er stefnt að því að það verði gert á fyrri helmingi þessa árs, að því er fram kemur í tilkynningu á vef fyrirtækisins. Þar segir Gunnþór Ingvason, forstjóri Síldarvinnslunnar, að markmiðið sé meðal annars að opna félagið fyrir fjárfestum.

Það er stjórn félagsins sem hefur tekið ákvörðun um að hefja undirbúning að skráningu hlutabréfa félagsins á aðalmarkað Nasdaq Iceland og hefur fyrirtækjaráðgjöf Landsbankans verið fengin til að hafa umsjón með verkefninu. LEX lögmannsstofa og endurskoðendafyrirtækið EY munu sjá um gerð áreiðanleikakannana.

„Þessi vegferð er farin með það í huga að efla félagið og opna Síldarvinnsluna fyrir fjárfestum,“ segir Gunnþór. „Með skráningu félagsins á markað fjölgar tækifærum fjárfesta til að koma að sjávarútvegi.“

Síldarvinnslan er fyrirferðamikið fyrirtæki í íslenskum sjávarútvegi. Ljósmynd/Síldarvinnslan

Öflugt fyrirtæki

Í tilkynningunni er Síldarvinnslan sögð eitt af stærstu og öflugustu sjávarútvegsfyrirtækjum landsins, en fyrirtækið er stærsti framleiðandi uppsjávarafurða á Íslandi. „Fjárfestingar síðustu ára hafa miðað að því að styrkja félagið í bolfiskheimildum og fjölga þannig tekjustoðum félagsins.“

Þá segir að markvisst hafi verið ráðist í fjárfestingar í skipum og vinnslum til þess að auka gæði, nýtingu og verðmæti sjávarafurða auk þess að draga úr kolefnisspori við veiðar og vinnslu.

Fyrirtækið er í dag með um 360 starfsmenn og hefur höfuðstöðvar í Neskaupstað.

Tengdar fréttir

Síldarvinnslan

Samherji tekur Birting á leigu

• Fjölnir til Noregs
• Kaup Síldarvinnslunnar ganga til baka
• Sjóvá og Síldarvinnslan áfram í samstarfi
• Samfélagsspor Síldarvinnslunnar yfir 10 milljarðar

» Fleiri tengdar fréttir

• Blogga um frétt