Gamla Þinganesið selt til Skotlands

Skinney-Þinganes á Höfn í Hornafirði hefur selt gamla Þinganesið ÁR 25, áður SF, til Inverness í Skotlandi. Skipið er 30 ára gamalt, smíðað í Portúgal 1991, og hafði verið á söluskrá í rúmt ár.

Gamla Þinganesið hafði ekki verið í notkun í um ár eða frá því að nýtt Þinganes SF byrjaði róðra í byjun síðasta árs. Steinunn SF er systurskip nýja Þinganessins, bæði skipin smíðuð hjá Vard í Aukra í Noregi. Þau eru meðal sjö systurskipa, sem komu til landsins 2019.

Samfara nýsmíði á þessum skipum voru eldri Steinunn og Hvanney seld til Nesfisks í Garði, en þau skip voru smíðuð í Kína fyrir 20 árum.