Sextán stærstu gjaldendur veiðigjalds greiddu samanlagt um 3 milljarða króna í ríkissjóð, að því er fram kemur í tilkynningu á vef Fiskistofu. Þar er greint frá því að álagt veiðigjald vegna ársins 2020 var 4,8 milljarðar króna.

Heildarupphæð álagðra veiðigjalda lækkar nokkuð milli ára, en álagning er nú tengd afkomu. Þannig námu álögð veiðigjöld 6,6 milljörðum 2019 og 11,3 milljörðum 2018.

Gjaldendur í fyrra voru 934 talsins og voru flestir þeirra að greiða vegna veiða yfir sumarið en þá fóru strandveiðar fram og voru um sjö til átta hundruð sem greiddu í kjölfar slíkra veiða. Hópurinn var minnstur í janúar 2020 þegar gjaldendur voru um 150.

Þorskur skilar 58,7%

Það er Brim sem greiðir mestu veiðigjöldin eða 367 milljónir króna og Samherji greiðir næstmest eða 281 milljón. Á eftir kemur Þorbjörn með 250 milljónir króna, svo FISK Seafood með 231 milljón og svo Skinney-Þinganes með 197 milljónir króna.

Ef litið er til álagningar eftir póstnúmerum gjaldenda sést að Reykjavík (101), Vestmannaeyjar, Grindavík, Akureyri og Sauðárkrókur greiða mesta veiðigjaldið og greiða samanlagt 2,4 milljarða eða helming veiðigjaldsins. Þar af greiða gjaldendur í Reykjavík (101) 680 milljónir, í Vestmannaeyjum 550 milljónir, í Grindavík 530 miljónir, á Akureyri 400 milljónir og á Sauðárkróki 240 milljónir.

Þorskurinn skilar ríkissjóði 58,7% af veiðigjaldi ársins 2020 eða 2,8 milljörðum króna, næstmestu skilar ýsa eða 780 milljónum króna. Grálúða skilar 400 milljónum, makríll 260 miljónum og síld 210 milljónum.

Tengdar fréttir

Veiðigjöld

23 prósenta aukning veiðigjalda

• „Eins og að pissa í skóinn sinn“
• Veiðigjaldið skili 14,3 milljörðum
• „Er þetta réttlát skipting?“
• Þriðjungi meira í veiðigjöld

» Fleiri tengdar fréttir

• Blogga um frétt