Mikilvægt að verja fisk gegn fugladriti

Mikilvægt er að koma í veg fyrir að fiskur verði fyrir utanaðkomandi mengun eins og fugladriti þegar afli er landaður, er meðal þess er segir í tilkynningu á vef Matvælastofnunar (MAST). Telur stofnunin að það sé „of algengt að fugl komist óhindraður í óvarinn afla í fiskörum á bryggjum landsins.“ Til þess að koma í veg fyrir mengun er krafist að kör séu lokuð og að flutningur fari fram í lokuðum ökutækjum.

Jafnframt telur MAST ástæðu til að minna á að fiskur sem af slysni fellur úr kari á bryggjuna er ekki hæfur til manneldis.

Þá segir að löndun á fiski sé umfangsmikil yfir sumartímann þar sem strandveiðar eru stundaðar um allt land. Því sé „brýnt að tryggja viðeigandi hreinlæti og kælingu frá veiði og þar til fiskurinn fer á borð neytenda.“

Óhrein kör

Fram kemur að eftirlitsmenn MAST hafa orðið varir við óhrein fiskikör auk þess sem stofnuninni berast reglulega kvartanir frá sjómönnum og fiskkaupendum um óhrein og skemmd löndunarkör. Bent er á að kör sem notuð eru undir matvæli þurfa að vera hrein og er það eingöngu tryggt með hreinsun eftir hverja notkun.

Frétt af mbl.is

Birta myndir af óhreinum fiskikörum

Einnig er sagt „óæskilegt“ að nota fiskikör fyrir annað en matvæli, séu kör notuð undir annað þarf að merkja þau sérstaklega og ekki nota aftur fyrir matvæli.

„Matvælastofnun mun fylgjast áfram með ástandi kara og hvetur þá sem leggja kör fram til löndunar að minnast þess að körin eru ílát undir matvæli,“ segir í tilkynningunni.

• Blogga um frétt