Nýr sveifarás 11 tonn

Lagarfoss, flutningaskip Eimskips, hélt af stað í prufusiglingu í gærmorgun að lokinni viðgerð. Skipið hefur verið stopp vegna vélarbilunar í einn og hálfan mánuð. Skipta þurfti um sveifarás í vélinni.

Ef allt gengi að óskum var stefnt var að því skipið sigldi á ströndina í gærkvöldi. Komið verður við í nokkrum höfnum á landinu og að því búnu siglir skipið til Færeyja og Bretlands en það siglir á gulu leiðinni hjá Eimskip.

Það var sunnudaginn 27. desember sl. að Lagarfoss varð vélarvana um 230 sjómílur suðvestur af Garðskaga. Skipið var þá á leið til Kanada og Bandaríkjanna fulllestað vörum.

Þegar ljóst varð að viðgerð bar ekki árangur var varðskipið Þór kallað út til aðstoðar. Tók Þór Lagarfoss í tog og komu skipin til Reykjavíkur 30. desember. Lá skipið í Sundahöfn á meðan viðgerð fór fram.