Óðinsbryggjan verður endurbyggð

Faxaflóahafnir ætla að endurbyggja Verbúðarbryggjuna í Gömlu höfninni í Reykjavík á þessu ári. Hún hefur verið dæmd ónýt og verður rifin.

Bryggjan er fyrir framan Sjóminjasafnið og hafa varðskipið Óðinn og dráttarbáturinn Magni gamli legið við hana undanfarin ár. Bryggja þessi hefur stundum verið nefnd Óðinsbryggja.

Hönnun bryggjunnar er langt komin hjá verkfræðistofunni Eflu og er reiknað með að bjóða framkvæmdina sjálfa út í vor, að því er Inga Rut Hjaltadóttir, forstöðumaður tæknideildar Faxaflóahafna, upplýsti Morgunblaðið um. Um síðustu helgi var auglýst útboð á söguðum harðvið og staurum í bryggjuna og verða tilboð opnuð 1. mars.

Bryggjan verður 60 metra löng og sjö metra breið timburbryggja á timburstaurum. Hún verður endurbyggð með svipuðu formi og nú er.

Frétt af mbl.is

Óðinn sigldi á ný

Kostar 120 milljónir

Áætlaður heildarkostnaður við framkvæmdirnar er um 120 milljónir króna. Þar af eru efniskaup um 45 milljónir. Stefnt er að því að framkvæmdir hefjist á öðrum ársfjórðungi. Reiknað er með að verkið taki 4-6 mánuði, segir Inga Rut.

Í Vesturhöfn Gömlu hafnarinnar í Reykjavík eru fjórar timburbryggjur. Sú ysta, Síldarbryggjan, hefur verið breikkuð og endurbætt á síðustu áratugum og telst í þokkalegu ástandi. Innri bryggjurnar þrjár, við Kaffivagninn, kallast einu nafni Verbúðabryggjur. Ytri bryggjurnar tvær voru opnaðar, tekinn af þeim mesti hallinn og þær endurnýjaðar upp úr 1990.

Innsta bryggjan við Sjóminjasafnið hefur lítið viðhald fengið síðustu áratugi. Hún var dæmd ónýt árið 2018 og ákvað stjórn Faxaflóahafna að láta vinna að hönnun nýrrar bryggju og nú er komið að framkvæmdum.