„Ufsinn er óvenju brellinn um þessar mundir“

Það þarf að leita að ufsanum þessa dagana og hefur hann ekki að finna á Vestfjarðarmiðum, að sögn Friðleifs Einarssonar, skipstjóra á ísfisktogaranum Helgu Maríu AK.

„Ufsinn er óvenju brellinn um þessar mundir. Hann hefur ekki fundist á Vestfjarðamiðum og hér fyrir sunnan land er leitun að honum. Við fáum eitt og eitt þokkalegt ufsahol og svo er leitað og leitað,“ segir Friðleifur á vef Brims, sem gerir Helgu Maríu út. Hann segir áhöfnina hafa leitað á Eldeyjarbanka, Reykjanesgrunni og Fjöllunum.

Helga María AK. Ljósmynd/Brim

„Það er nóg af gullkarfa og ýsu en ufsinn er sem fyrr segir vandfundinn. Reyndar er það svo að við erum á hálfgerðum flótta undan ýsunni því það virðist vera ýsa alls staðar þar sem trolli er dýft,“ segir skipstjórinn, en gert er ráð fyrir að skipið komi til hafnar á fimmtudag.

Friðleifur telur aflinn sé nú kominn í um það bil 60 tonn. „Við vildum gjarnan vera með meira en það hefur verið skítabræla á okkur og hvergi skjól að hafa. Veðrið var virkilega slæmt um helgina en við reyndum hvað við gátum. Við erum aðeins byrjaðir að verða varir við hrygningarþorsk en í augnablikinu höfum við þó mestar áhyggjur af því að veiða ekki of mikið af ýsu. Fiskurinn virðist annars vera vel haldinn og er stór og góður.“

• Blogga um frétt