Tæplega níu milljarða hlutafjárútboði Arctic Fish er nú lokið. Vestfirska fiskeldisfyrirtækið hefur sótt um skráningu í kauphöllinni í Ósló. Hlutafjárútboðinu lauk fyrr en áætlað var. Í tilkynningu frá Arctic Fish segir að því hafi lokið fyrr vegna margfaldrar umframeftirspurnar.

Sala á nýju hlutafé í félaginu nam 5,3 milljörðum auk þess sem einn hlutahafi seldi hluti sína að andvirði 2,7 milljarða. Gengið í útboðinu var 61,2 norskar krónur á hlut, sem samsvarar u.þ.b. 934 íslenskum krónum. 

Fjármagni verður varið í frekari uppbyggingu félagsins og fjárfest verður í stækkun á seiðaeldi. 

Yfir 40 íslenskir fjárfestar tóku þátt

Fjórir nýir hornsteinsfjárfestar tóku þátt í útboðinu og fjárfestu fyrir 1,5 milljarða samtals, þar af þrjú íslensk félög. Það voru eignastýring norska bankans Nordea, Birta lífeyrissjóður, Lífeyrissjóður Vestmannaeyja og tryggingafélagið Vörður. 

Alls tóku rúmlega 40 íslenskir fjárfestar þátt í útboðinu. Þá var góð þátttaka meðal starfsfólks og lykilstarfsmanna Arctic Fish ásamt því að núverandi hluthafar juku við sinn hlut fyrir 3,8 milljarða. 

Íslenskt eignarhald eykst

Íslenskt eignarhald á Arctic Fish var fyrir útboðið 2,5% en það eykst nú og verður 10,2%. Viðskipti hefjast með bréf Arctic Fish í kauphöllinni í lok vikunnar – þá er mögulegt að íslenskt eignarhald aukist enn frekar. 

Eftir viðskiptin mun Norway Royal Salmon ASA, sem áður átti helming hlutafjár, eiga um það bil 51,3% hlut í félaginu en Bremesco Ltd., sem fyrir átti 47,5%, mun eiga um 26,2% hlutafjár.

Félagið hefur sótt um að hlutir félagsins verði teknir til viðskipta á Euronext Growth- markaðnum í Osló og að óbreyttu munu viðskipti með bréfin hefjast föstudaginn 19. febrúar næstkomandi.

Tengdar fréttir

Fiskeldi

Thor fær leyfi til fiskeldis

• Allt landeldi í uppnámi
• Eining um vöktun grunnvatns
• Tillaga að 12 þúsund tonna eldi Geo Salmo
• Sigurður Arnar til liðs við Laxey

» Fleiri tengdar fréttir

• Blogga um frétt