Beitir landaði 900 tonnum af loðnu

Beitir NK kom til hafnar í morgun í Neskaupstað með 900 tonn af loðnu. Loðnan fékkst í fjórum köstum í Meðallandsbugtinni. Þetta kemur fram á heimasíðu Síldarvinnslunnar.

Haft er eftir Tómasi Kárasyni, skipstjóra á Beiti, að aflinn hafi fengist í gær og gærkvöldi, besta kastið hafi verið tæp 500 tonn. 

Tómas kveðst ánægður með loðnuna í samtali við 200 mílur. Hann segir aflann vera um 40% hrygnu og hrognafyllingu um 13%-14%. „Vonandi fer þetta allt á Japanmarkað,“ segir Tómas. 

Hann segir áhöfnin hina hressustu með fyrstu loðnuna í þrjú ár og góða stemmningu í vinnslu Síldarvinnslunnar. 

Beitir og Börkur í samstarfi

Greint var frá því í gær að gert hefur verið samkomulag á milli áhafna Beitis og Barkar, skipa Síldarvinnslunnar, um samstarf á skipulagi veiða svo hægt sé að landa sem ferskastri loðnu í hvert skipti. Skipin munu skiptast á að landa og dæla loðnu á milli skipa á miðunum, ef á þarf að halda. Aflaverðmætum verður skipt á milli áhafna. 

Slíkt samstarf var reynt á síðustu makrílvertíð og segir á heimasíðu Síldarvinnslunnar að það hafi reynst vel. Því verður gripið til þess aftur, nú á loðnuvertíð í fyrsta sinn.

• Blogga um frétt