„Falleg loðna og lyktin góð“

Tæpur tugur loðnuskipa var að veiðum undan Skeiðarársandi í gær; íslensk, færeysk og grænlensk skip. Venus NS var búinn að kasta einu sinni og fá um 200 tonn þegar rætt var við Berg Einarsson skipstjóra um hádegisbilið.

„Þetta er stór og falleg loðna og lyktin góð,“ segir Bergur í Morgunblaðinu í dag. Hann sagði að þarna væri loðna á stóru svæði, en nokkuð tætingsleg. Enn var talsverð kvika og sagðist Bergur gera sér vonir um að loðnan myndi þétta sig þegar veður gengi niður eftir brælu helgarinnar.

Meðal skipa á miðunum á Meðallandsbug í gær voru Síldarvinnsluskipin Beitir og Börkur. Haft var eftir Tómasi Kárasyni, skipstjóra á Beiti, að víða væri eitthvað að sjá. „Hér er heldur leiðinleg sunnanátt en það er vel hægt að kasta, þannig að veðrið háir okkur ekki,“ var haft eftir Tómasi á heimasíðunni í gærmorgun.