Kominn með upp í kok af fiskibollulykt

„Þetta er bara búið að vera rugl,“ segir Kristján Berg, einnig þekktur sem fiskikóngurinn, en það eru ekki bara rjómabollurnar sem seldust vel í gær og um helgina. Fiskibollur fiskikóngsins hafa rokið út, rúmlega fimm tonn.

„Við bara getum ekki framleitt meira en 800 kíló af bollum á dag,“ segir Kristján og bætir því við að allar bollurnar væru að seljast. Salan er töluvert meiri í ár en undanfarin ár og segir Kristján að það megi rekja til þess að allir Íslendingar séu á landinu.

„Þegar eitthvað bjátar á eins og er núna með Covid, þá fara menn bara aftur í hefðirnar,“ segir Kristján.

Ríflega fimm tonn af fiskibollum ruku út í gær hjá Fiskikónginum. mbl.is/Kristinn Magnússon

Ætti að vera lögbundinn frídagur

Hann segir sprengidag ætti að vera lögbundin frídag fiskisala, enda alla jafnan rólegasti dagur ársins eftir mjög annasaman dag. Sömuleiðis segir hann vikuna eftir bolludag almennt rólega og hann hafi vanalega tekið hanan í frí, jafnvel farið erlendis. Það hafi þó ekki verið hægt í ár.

„Ég er allavega kominn með upp í kok af fiskibollulykt í bili, enda meiri lykt af þeim en rjómabollunum,“ segir Kristján að lokum.