Fiskistofa horfi á „menn að skíta“
Setja bókamerki
Á vef Fiskistofu er brugðist við gagnrýni við notkun stofnunarinnar á drónum, eða flygildum, til eftirlits með fiskveiðum við Ísland og fullyrt að slík notkun sé í samræmi við persónuverndarlög á Íslandi og í samræmi við leiðbeiningar frá Persónuvernd.
Landssamband smábátaeigenda hefur gagnrýnt eftirlitsaðferðina harðlega og segir jafnræðis ekki gætt við myndavélaeftirlit né heldur meðalhófsreglu beitt. LS áskilur sér rétt til þess að leita til Persónuverndar vegna þessarar nýju aðferðar Fiskistofu.
Í tilkynningu Fiskistofu er tilefni og aðdragandi drónanotkunarinnar rakinn. Þá kemur fram að tækjunum er ávallt stjórnað af veiðieftirlitsmanni sem er viðstaddur og sér myndefnið úr myndavél drónans í beinu streymi.
„Annars vegar er um að ræða vöktun í rauntíma þar sem myndefni er ekki safnað og hins vegar söfnun myndefnis í þeim tilfellum þar sem upp kemur grunur um frávik frá lögum og reglum. Upptaka er því ekki virkjuð nema í þeim tilvikum að eftirlitsmaður hefur séð brot.“
Samkvæmt fyrirmælum Persónuverndar
Þá fari vinnsla á myndefni fram samkvæmt gildandi reglum og fyrirmælum Persónuverndar.
Einnig kemur fram að Fiskistofa hafi unnið mat á áhrifum vinnslunnar á persónuvernd áður en beiting dróna hófst og talið áhættuna litla. Eftirlitsmenn hafi þá fengið fræðslu um persónuvernd og leitað hafi verið til Persónuverndar varðandi notkun á dróna.
„Fiskistofu er með lögum falið að fylgjast með framkvæmd laga um stjórn fiskveiða og að hafa eftirlit með fiskveiðum. Með hliðsjón af því var það mat Persónuverndar að vinnsla Fiskistofu á upplýsingum um refsiverðan verknað á þann hátt sem lýst var í erindi Fiskistofu til Persónuverndar falli undir lögbundið hlutverk stofnunarinnar. Að öðru leyti gerði Persónuvernd ekki frekari athugasemdir við Fiskistofu um málið að svo stöddu,“ segir á vef Fiskistofu.
Þá barst Fiskistofu vísa frá skipstjórnarmanni vegna umræðunnar um drónaeftirlit:
Af Fiskistofu fer það orð
að flygildi þeir vilji nýta.
Þá geta leyst öll lúðumorð
og líka horft á menn að skíta.
Húsinu verði fundinn annar staður
Máli foreldra gegn kennurum vísað frá
Ráðherra ekki á fundi varnarmálaráðherra
Er bókin ónothæf eða góð yfirferð?
Spáin að ganga eftir: Stormur, rigning og asahláka
Yrði leiðinlegt líf án smá átaka
Byggingarfulltrúi viðurkennir mistök