Sprengidagurinn nú tvöfaldur

Loðnuvertíðin fer ágætlega af stað og íslensku uppsjávarskipin eru hvert af öðru að tygja sig til veiða eftir tveggja ára loðnubrest. Í gær var loðnu landað úr Kap í Vestmannaeyjum, Beiti í Neskaupstað og Venus á Vopnafirði.

„Það er hrikalega gaman að vera byrjaður,“ sagði Sigurgeir Brynjar Kristgeirsson, framkvæmdastjóri Vinnslustöðvarinnar í Vestmannaeyjum, í gær. „Loðnan skiptir allt samfélagið máli; ríki, sveitarfélög, sjómenn, starfsfólk í landi, að ógleymdum fyrirtækjunum.“

Heimildir íslenskra veiðiskipa á loðnuvertíðinni eru tæplega 70 þúsund tonn og segir Sigurgeir blasa við að hátt verð fáist og erfitt verði að svara öllum markaðssvæðum, sem hrópi á loðnuafurðir. Til að metta hrognamarkaðinn hefði þurft um tvöfalt stærri vertíð, sem hefði gefið yfir 10 þúsund tonn af hrognum. Hann segir að þessi staða geti leitt til þess að einhver fyrirtæki og jafnvel markaðslönd, eins og t.d. Hvíta-Rússland, ráði ekki við hátt verð og fái ekki loðnu í ár. Þá sé hættan á að þau leiti í aðrar afurðir.

Loðnuvertíð er fagnað á heimasíðum fyrirtækjanna og þannig er talað um sprengidag í tvöföldum skilningi á heimasíðu Vinnslustöðvarinnar. Annars vegar sprengidag samkvæmt almanakinu og hins vegar upphaf loðnuvertíðar.