Jón forseti á uppboð

Uppboð fer fram á miðvikudaginn kemur, 3. mars, á báti með því sögufræga nafni Jón forseti. Þetta er framhaldsuppboð, sem fram fer að kröfu Faxaflóahafna.

Jón forseti er eikarbátur, 31 tonn að stærð. Hann hefur legið við Verbúðarbryggjurnar við Kaffivagninn síðan árið 2009 og lítið eða ekkert eftirlit haft með honum síðustu árin, samkvæmt upplýsingum frá Faxaflóahöfnum. Því hefur hlaðist upp kostnaður.

Í ágúst í fyrra var Jón forseti dreginn að athafnasvæði Eimskips í Vatnagörðum í Sundahöfn og síðan tekinn á land. Þar mun sýslumaðurinn á höfuðborgarsvæðinu bjóða bátinn upp klukkan 10 að morgni.