Norræna siglir eftir andlitslyftingu

Norræna er nú í Þórshöfn í Færeyjum en skipið lagði frá bryggju í Hirtshals í Danmörku á laugardag og mun skipið innan skamms sigla til Seyðisfjarðar. Er þetta fyrsta ferðin eftir viðgerð og andlitslyftingu í skipasmíðastöð á Fjóni.

„Skipið tekur hundrað farþegum meira og við getum veitt farþegunum betri þjónustu og upplifun um borð,“ segir Linda Gunnlaugsdóttir, framkvæmdastjóri Smyril Line á Íslandi.

Útlit farþegaferjunnar er breytt. 50 káetum var bætt við með því að byggja yfir níunda þilfarið. Þá var sett nýtt útsýniskaffihús og bar þar ofan á og telst það tíunda hæðin.

Linda Björk Gunnlaugsdóttir. mbl/Arnþór Birkisson

Linda segir að þótt Norrænu hafi ávallt verið haldið vel við hafi verið kominn tími á andlitslyftingu. Skipt hafi verið um teppi og gluggatjöld og sums staðar skipt um húsgögn. Þá hafi verið settar upp sögulegar myndir frá Færeyjum og Íslandi.

Loks nefnir hún að svítum hafi verið fjölgað þannig að fólk hafi meira val um gistingu og heitu pottunum vinsælustu á efsta þilfari fjölgað.

Einstakt útsýni er úr kaffihúsi og bar á efstu hæð skipsins Ljósmynd/Smyril line

Ljósmynd/Smyril line

„Mér finnst þetta hafa heppnast vel í alla staði. Búið var að undirbúa breytingarnar vel og allar tímasetningar og kostnaðaráætlanir hafa staðist. Við hlökkum til að taka á móti skipinu á Seyðisfirði. Við höldum þó upp á tímamótin síðar, þegar meira losnar um samkomutakmarkanir,“ segir Linda.

Norræna kemur til Seyðisfjarðar klukkan níu á þriðjudagsmorgun. Linda segir að einhverjir tugir farþega eigi bókað með skipinu næstu vikur en segir að mikið sé spurt um siglingar til Færeyja og Íslands seinnihluta sumars og í haust.

Dansandi Færeyjingar. Sögulegar myndir frá Færeyjum og Íslandi eru víða. Ljósmynd/Smyril line

Skipið er hið glæsilegasta. Ljósmynd/Smyril line

Ljósmynd/Smyril line