Leyfi til laxeldis í Djúpinu í farvatninu

Nú hillir undir að laxeldi geti hafist í Ísafjarðardjúpi. Fyrst í röðinni er Háafell, dótturfyrirtæki Hraðfrystihússins-Gunnvarar.

Matvælastofnun og Umhverfisstofnun hafa kynnt tillögur að rekstrar- og starfsleyfum til fyrirtækisins til eldis á 6.800 tonnum af laxi í Djúpinu. Aðeins aftar í röðinni eru umsóknir Arctic Fish og Arnarlax.

Háafell hefur leyfi til 6.800 tonna eldis á regnbogasilungi og fellur það úr gildi þegar laxeldisleyfið verður gefið út. Leyfið er miðað við hámarkslífmassa sem þýðir að heildarframleiðsla á ári getur orðið rúmlega 5.400 tonn.

Reikna má með að leyfi verði gefin út á næstu vikum. Háafell stefnir að því að setja fyrstu laxaseiðin út í sjókvíar vorið 2022. Þau koma frá seiðaeldisstöð fyrirtækisins á Nauteyri í Ísafjarðardjúpi, að því er fram kemur í Morgunblaðinu í dag.