Afurðin tilbúin innan klukkustundar

Í nýju tæplega fjögurra mínútna kynningarmyndbandi frá nýrri hátæknifiskvinnslu Samherja á Dalvík er vinnsluferill ferskra botnfiskstykkja sýndur og útskýrður. 

Myndbandið sýnir Björgúlf EA-321, ísfisktogara Samherja, koma í höfn á Dalvík og landa árla morguns. Löndun afla og vinnsluferlið er sýnd bæði með myndefni úr vinnslunni og grafík allt að fullunninni vöru sem tilbúin er til vöruflutnings.

Myndbandið hefur yfirskriftina The Quest for quality - eða Leitin að gæðum. Í því segir að fullunnin vara sé tilbúin á innan við klukkustund frá því að fiskinum er landað. 

„Í vinnsluhúsinu, sem var tekið í notkun hinn 14. ágúst í á síðasta ári, eru vinnslulínur frá Völku, flökunarvélar frá Vélfagi, hausarar frá Baader Ísland, lausfrystar frá Frost, stöflunarróbótar og róbót sem losar kör frá Samey. Þá er þar að auki búnaður frá Skaganum 3X, Marel, Raftákn, Slippnum og fleiri íslenskum fyrirtækjum. Tækin í húsinu og sá hugbúnaður sem þar er notaður er afrakstur þróunarsamstarfs Samherja og fyrirtækjanna sem framleiddu þau. Í reynd er um að ræða nýjar, sérhæfðar lausnir sem byggja á nýsköpun og frumkvöðlastarfi,“ segir á vef Samherja um nýja kynningarmyndbandið. 

• Blogga um frétt