„Frábært að allt gekk svona vel“

Hoffell er nú á landleið með 1.650 tonn af kolmunna af miðunum vestur af Írlandi, en siglingin er um 700 mílur af miðunum til Fáskrúðsfjarðar. Fram kemur í færslu á Facebook-síðu Loðnuvinnslunnar, sem gerir Hoffellið út, að túrinn hafi gengið vel. „Veðrið var gott og aflinn fékkst á rúmum 3 sólarhringum.“

Um er að ræða eina íslenska skipið sem hélt á kolmunnamiðin eftir loðnuvertíðina. „Oft tekur alveg fyrir veiði á þessu svæði þegar komið er fram undir 20. mars, því er frábært að allt gekk svona vel,“ segir í færslunni.

Að meðtöldum aflanum sem Hoffell siglir með nú mun skipið hafa landað tæplega 6.500 tonnum af kolmunna og er því með mesta kolmunnaafla íslensku uppsjávarskipanna. Gert er ráð fyrir að Hoffell leggi við bryggju eftir miðnætti annað kvöld.

• Blogga um frétt