Dóra Björk hafnarstjóri í Vestmannaeyjum

Framkvæmda- og hafnarráð Vestmannaeyja samþykkti á fundi í síðustu viku að ráða Dóru Björk Gunnarsdóttur í starf hafnarstjóra, fyrsta kvenna í Vestmannaeyjum. 

„Bara út af ótrúlegum áhuga á samfélaginu mínu. Þegar þú býrð í Vestmannaeyjum er höfnin lífæð,“ segir Dóra Björk í samtali við 200 mílur aðspurð út í hvers vegna hún sóttist eftir starfinu. 

Dóra telur stóru verkefnin fram undan við Vestmannaeyjahöfn utan við daglegan rekstur hennar vera framtíðaráform um stórskipahöfn í Eyjum. 

Kennari, framkvæmdastjóri, rafiðnnemi

Ráðgjafi frá Hagvangi var hafnarráði innan handar við ráðninguna og segir í rökstuðningi um ráðninguna að Dóra Björk hafi háskólamenntun sem grunnskólakennari og stundi nú meistaranám við viðskiptadeild Háskólans á Bifröst auk þess sem hún leggur stund á nám við grunndeild rafiðnaðar við framhaldsskólann í Vestmannaeyjum.

Dóra Björk starfar í dag sem stundakennari í Visku símenntunarmiðstöð og kennir m.a. upplýsingatækni. Dóra Björk var framkvæmdastjóri ÍBV á árunum 2013-2019 og öðlaðist þar umtalsverða stjórnunar- og rekstrarreynslu.

„Hún býr yfir miklum leiðtogahæfileikum, drifkrafti og frumkvæði sem mun koma að gagni við að leiða umbætur hjá Vestmannaeyjahöfn. Dóra Björk býr jafnframt yfir ríkum skipulagshæfileikum, þjónustulund og er sjálfstæð í vinnubrögðum. Reynsla hennar af stefnumótun og samstarfi við marga ólíka hagsmunaaðila við m.a. skipulagningu Þjóðhátíðar og fjölmennra íþróttaviðburða á vegum ÍBV mun nýtast í starfi,“ segir í rökstuðningi ráðningarinnar.

• Blogga um frétt