Björg fékk útkall í hæsta forgangi

Björgunarskipið Björg á Rifi á Snæfellsnesi var kallað út á hæsta forgangi um sjö mínútur fyrir eitt í dag. Áhöfnin á smábát sem staddur var rétt fyrir utan höfnina á Rifi óskaði eftir aðstoð eftir að uppgötvaðist leki um borð, að því er fram kemur í fréttatilkynningu frá Landsbjörg.

„Átta mínútum seinna var B/S Björg kominn á staðinn mönnuð sjö sjálfboðaliðum frá björgunarsveitum frá Snæfellsnesi. Vel gekk að koma bátnum aftur upp að bryggju þar sem böndum var komið á lekan. Báturinn sem var aðstoðaður er tæplega 9 metra langur línu- og handfærabátur smíðaður úr plasti sem sigla átti til Reykjavíkur,“ segir í tilkynningunni.

Þá segir að þetta sé fimmta útkallið sem Björg sinnir í marsmánuði þar sem sjófarendur hafa þurft aðstoð.

• Blogga um frétt