Fyrstu grásleppubátarnir lögðu netin á miðvikudag, en fyrsti dagur vertíðarinnar var á þriðjudag. Aðrir ákváðu að bíða átekta, m.a. vegna þess að veðurútlit er ekki sérlega gott. Í gær höfðu 19 bátar fengið heimild til að hefja veiðar.

Rúmur þriðjungur þeirra er gerður út frá Ólafsfirði, þrír frá Árskógssandi og tveir frá Dalvík. Aðrir röðuðu sér jafnt á eftirtalda staði: Bakkafjörð, Grímsey, Grenivík, Akureyri, Hólmavík, Drangsnes, Patreksfjörð og Kópasker.

Í fyrra mátti byrja veiðar 10. mars og vertíðin var komin á nokkurt skrið þann 24. mars og 56 bátar þá farnir til veiða.

„Vertíðin nú er hlaðin óvissu þar sem kaupendur og umsýsluaðilar með grásleppuhrogn hafa enn ekki gefið út verð eða hversu mikið magn þeir þurfa að fá til sín. Búkurinn sem undanfarnar vertíðir hefur skilað góðu verði er verðlaus í dag sökum mikilla birgða í Kína frá síðustu vertíð. Af þeim sökum og ýmsum öðrum orsökum verður ekki skylt að landa grásleppunni á vertíðinni og líklegt að þeir sem hafi aðstöðu til muni skera hana úti á sjó,“ segir m.a. á heimasíðu Landssambands smábátaeigenda.

Tengdar fréttir

Grásleppuveiðar

Sakar Þórarin Inga um brot á siðareglum

• Álag á starfsfólki vegna grásleppukvóta
• Þó nokkur munur á kvóta og fjölda báta
• Þrjár útgerðir umfram hámark í grásleppu
• Yfir 100 skip fá ekki grásleppukvóta

» Fleiri tengdar fréttir