Gullverið gerir góða túra

„Þetta var bara fínasti túr,“ segir Þórhallur Jónsson, skipstjóri á Gullveri NS. Gullverið landaði 116 tonnum af botnfiski á Seyðisfirði í gær og hélt strax aftur á miðin í gærkvöldi. 

Gullverið var statt á Hvalbaksgrunninu þegar blaðamaður 200 mílna náði tali af Þórhalli. Hann segist vera blessunarlega laus við ýsuna og sé mestmengis að veiða þorsk á þessu svæði. 

Að sögn Þórhalls voru þeir síðast í Hvalbakskallinu og Papagrunni. „Við vorum á Papagrunni og fengum ufsa og karfa þar og svo þorskinn í Hvalbakshallinu.“ Þórhallur segir að hann hafi verið um fjóra sólarhringa að fylla í ágætisveðri „fyrir utan einn dag, það var skítaveður í einn dag, annars ágætt í sjóinn“.

„Við erum búnir að fara þrjá góða túra núna eftir rallið með Hafró. Það er bara búið að ganga mjög vel.“ Samkvæmt löndunartölum Fiskistofu landaði Gullverið einnig 130 tonnum 29. mars.

• Blogga um frétt