Á kolmunnavertíð suður af Færeyjum

Íslensku uppsjávarskipin hafa síðustu daga tekið stefnuna á kolmunnamið fyrir sunnan Færeyjar. Kolmunninn er að ganga norður á bóginn eftir hrygningu og hefur verið beðið eftir að hann kæmi inn í alþjóðlega hafsvæðið, gráa svæðið, á mótum færeyskrar og skoskrar lögsögu og síðar inn í færeyska lögsögu.

Oft hafa veiðar byrjað þarna upp úr 10. apríl og í gær voru skipin að draga, en litlar fréttir voru af aflabrögðum. Í gær mátti sjá að íslensk, rússnesk og eitt færeyskt skip höfðu raðað sér á línu syðst á veiðisvæðinu. Meðal annars voru Bjarni Ólafsson, Beitir, Börkur, Hoffell, Guðrún Þorkelsdóttir og Ísleifur á miðunum, auk Polar Amaroq frá Grænlandi. Í höfn í Fuglafirði var Aðalsteinn Jónsson, nýja skipið Vilhelm Þorsteinsson var á leið á miðin frá Færeyjum og Kap, Venus og Víkingur voru á leið á miðin frá Íslandi.

Alls er íslenskum skipum heimilt að veiða liðlega 200 þúsund tonn af kolmunna á þessu ári, með flutningi á milli ára. Þau eru þegar búin að veiða tæplega 23 þúsund tonn og því eru tæp 180 þúsund óveidd. Hoffellið náði 6.500 tonnum í vetur í nokkrum túrum, m.a. á miðin vestur af Írlandi, að því er fram kemur í Morgunblaðinu í dag.