Hófu samstarf um virkjun hliðarvinds

Fyrstu mælingar vegna rannsóknaverkefnis Sidewind eru hafnar um borð í Helgafelli sem gert er út af Samskipum. Markmið íslenska frumkvöðlafyrirtækisins Sidewind, sem vinnur að þróun umhverfisvænna lausna fyrir flutningaskip, er að finna leiðir til að nýta hliðarvind í rafmagnsframleiðslu í vindmyllugámum.

Verkefnið nýtur stuðning Samskipa og segir í fréttatilkynningu frá skipafélaginu að talið er að með aðferðinni megi framleiða 5 til 30 prósent af orkuþörf skipa og þannig draga úr notkun jarðefnaeldsneytis og tilheyrandi útblæstri.

Þá stefni Sidewind á framleiðslu vindtúrbína sem komið er fyrir í opnum gámum sem nýta hliðarvind sem annars færi til spillis til framleiðslu rafmagns. „Frumgerð vindmyllu Sidewind hefur þegar verið prófuð í vindgöngum í Háskólanum í Reykjavík, vindmælingar eru hafnar um borð í Helgafelli og vinna við smíði frumgerðar í fullri stærð sem verður prófuð um borð er að hefjast,“ segir í tilkynningunni.

Helgafell skip Samskipa Ljósmynd/Samskip

 Skrifað var undir samning um stuðning Samskipa við verkefnið föstudaginn 9. apríl og segir Óskar Svavarsson, stofnandi  og forstjóri Sidewind: „Okkur finnst frábært að fá svona öflugt fyrirtæki eins og Samskip með okkur í lið. Samstarfið mun efla báða aðila við þróun grænna lausna.“

„Við hlökkum til samstarfsins við Sidewind og finnst þetta verkefni afar spennandi. Samskip eru ávallt með augun opin fyrir tækifærum til að draga úr umhverfisáhrifum starfseminnar og gleður okkur að fá að taka þátt í þróun þessarar nýju tækni,“ segir Þórunn Inga Ingjaldsdóttir, forstöðumaður markaðs- og samskiptadeildar Samskipa.

Sidewind ehf. er frumkvöðlafyrirtæki með höfuðstöðvar í Reykjavík. Fyrirtækið er í eigu stofnendanna, Maríu Kristínar Þrastardóttur og Óskars Svavarssonar. Sidewind byggir á hugmynd Óskars um framleiðslu rafmagns með láréttum vindtúrbínum í opnum gámum.

Frétt af mbl.is

Fyrsta gasskipið með vörur til Íslands

• Blogga um frétt