Bæta við 8 þúsund tonnum af ýsu

Bætt verður við aflamark í ýsu því sem nemur 8.000 tonnum til að mæta vanda útgerða sem nú upplifa mikla ýsugengd á veiðisvæðum umhverfis Ísland. Hins vegar telur Hafrannsóknastofnun að aðgerðin geti valdið því að sami vandi verði uppi á næsta fiskveiðiári.

Kristján Þór Júlíusson, sjávarútvegs- og landbúnaðarráðherra, undirritaði reglugerð sem eykur aflamark í ýsu í 52.419 tonn úr 44.419 tonnum. Hins vegar kemur fram í tilkynningu á vef Stjórnarráðsins að hækkunin verði dregin frá því aflamarki sem annars yrði úthlutað á fiskveiðiárinu 2021/2022.

Þá segir í tilkynningunni að „tilefni þessarar ákvörðunar eru erfiðleikar sem rekja má til mikillar ýsugengdar á veiðisvæðum við Ísland en þann 21. apríl var búið að veiða rúmlega 90% aflaheimilda í ýsu fyrir yfirstandandi fiskveiðiár“.

Svipaður vandi á næsta ári

Bæði Hafrannsóknastofnun og Fiskistofa telja ástæðu til þess að bregðast við þeirri stöðu sem upp er komin. Fram kemur í áliti Hafrannsóknastofnunar vegna málsins að stofnunin „leggst ekki gegn því að aflamark verði aukið á yfirstandandi fiskveiðiári enda verða heimildirnar dregnar frá því aflamarki sem annars yrði úthlutað á fiskveiðiárinu 2021/2022, samkvæmt samþykktri aflareglu“.

Jafnframt bendir Hafrannsóknastofnun á að „aukningin nú gæti valdið því að svipaður vandi komi upp á næsta fiskveiðiári og því mikilvægt að öllum verði ljóst að aukningin nú verði til frádráttar á komandi fiskveiðiári. Slík skilaboð samhliða úthlutun gætu stuðlað að því að ekki verði farið í aukna beina sókn í ýsustofninn sem aukið getur á mögulegan vanda á komandi fiskveiðiári.“

Ráðgjöf vegna ýsuveiða var hækkuð um 9% fyrir fiskveiðiárið 2020/2021 frá fyrra ári, en það ár hafði ráðgjöfin lækkað um fjórðung.

Frétt af mbl.is

Lækka ráðgjöf í þorski um 6%

• Blogga um frétt