Mörg einkaleyfi í sjávarútveginum

Umsóknum íslenskra aðila um skráningu vörumerkja og einkaleyfi fjölgaði á seinasta ári þrátt fyrir samdrátt í efnahagslífinu. Íslenskur sjávarútvegur og afleiddur iðnaður hans skipar stóran sess í skráningu einkaleyfa.

Samkvæmt greiningu sem unnin var og greint er frá í ársskýrslu Hugverkastofu tengist rúmlega fimmtungur íslenskra einkaleyfisumsókna á árunum 2010-2020 sjávarútvegi. Aðeins þýsk fyrirtæki eiga fleiri sjávarútvegstengd einkaleyfi hér á landi en íslenskir aðilar.

Alþjóðlegum umsóknum um vörumerki fækkaði á seinasta ári. Á sama tíma fjölgaði vörumerkjaumsóknum íslenskra aðila. Aftur á móti hefur umsóknum um skráningu hönnunar fækkað á seinustu árum.

Jón Gunnarsson samskiptastjóri Hugverkastofu segir að af einhverjum ástæðum hafi skráning á hönnun ekki náð sömu vinsældum meðal íslenskra hönnuða og annarra hönnuða í Evrópu. Virðast íslensk fyrirtæki, þ.ám. hönnuðir, frekar nota vörumerkjaskráningar í auknum mæli, að því er fram kemur í Morgunblaðinu í dag.