Kanna ástand sjávar í vorleiðangri

Rannsóknaskipið Bjarni Sæmundsson lagði frá bryggju á mánudag og við það hófst árlegur vorleiðangur Hafrannsóknastofnunar. Fram kemur á vef stofnunarinnar að leiðangurinn sé „liður í langtímavöktun á ástandi sjávar, næringarefnum, gróðri og átu á hafsvæðinu við Ísland“. Þá hafa rannsóknirnar á þessum árstíma staðið í um 60 ár.

Kannað er ástand sjávar í föstum sniðum auk þess sem mælingar eru framkvæmdar með síritandi mælitækjum á siglingaleið skipsins. Þá er magn og útbreiðsla ljósátu mæld með bergmálstækni og ljósátusýni skoðuð. Jafnframt er sýnum safnað fyrir Geislavarnir ríkisins vegna vöktunar á magni geislavirkra efna í sjó.

Í leiðangrinum verða rekdufl sett í sjóinn en þau mæla umhverfisþætti fyrir erlenda samstarfsaðila Hafrannsóknastofnunar.

Áætlað er að leiðangurinn vari í 15 daga.

• Blogga um frétt