Íslenskar sjávarafurðir lækka í verði

Verð íslenskra sjávarafurða hefur lækkað um tæplega 9% í erlendri mynt frá því á fyrsta árfjórðungi síðasta árs, rétt áður en kórónuveirufaraldurinn skall á. Vísitala botnfiskafurða hefur lækkað um 9,8% en uppsjávarafurða um 3,4%. Þetta kemur fram í Hagsjá Landsbankans.

Á móti þessu vegur að íslenska krónan hefur veikst um 7,3% á sama tímabili og fá sjávarútvegsfyrirtæki því fleiri krónur fyrir vörur seldar í erlendri mynt.

Samanlögð áhrif veikingar krónunnar og lækkunar afurðaverðs eru þó neikvæð um 2,1%, sé fyrsti fjórðungur þessa árs borinn saman við sama fjórðung í fyrra. Markaðsverðið hefur nú lækkað fjóra ársfjórðunga í röð. 

Heimsmarkaðsverð matvæla lækkaði nokkuð eftir að heimsfaraldurinn braust út, en tók svo við sér á þriðja fjórðungi síðasta árs og er nú um 20% hærra en þegar faraldurinn braust út. Heimsmarkaðsverð á kjöti er þó enn 3% lægra en fyrir faraldur.

• Blogga um frétt