Heimilaður makrílafli íslenskra skipa verður 140.627 tonn í ár, en Kristján Þór Júlíusson, sjávarútvegs- og landbúnaðarráðherra, hefur undirritað reglugerð þess efnis. Um er að ræða 16,5% af þeim heildarafla sem samþykktur hefur verið í Norðaustur-Atlanthshafsfiskveiðinefndinni (NEAFC), að því er fram kemur á vef Stjórnarráðsins.

Enn hefur ekki verið fundin lausn í makríldeilunni og er ljóst að gefnar verða út veiðiheimildir langt umfram ráðgjöf Alþjóðahafrannsóknaráðsins (ICES) sem hefur lagt til að ekki verði veitt umfram 852 þúsund tonn.

Sex af sjö strandríkjum hafa tilkynnt hvað þau hyggjast veiða og nemur það rúmlega 1041,5 þúsund tonnum, eða tæpum 190 þúsund tonnum umfram ráðgjöf. Þá hyggjast Norðmenn veiða 298 þúsund tonn, Rússar rúm 120 þúsund tonn, Bretar um 222 þúsund tonn, Evrópusambandið 200 þúsund tonn, Grænlendingar 60 þúsund tonn og Íslendingar tæplega 141 þúsund tonn. Færeyingar hafa enn ekki gefið út hvað þeir hyggjast veiða af makríl í sumar.

Í ljósi stöðunnar er fátt sem bendir til þess að lausn á deilunni sé í sjónmáli en ákvörðun Norðmanna um 298 þúsund tonna veiðar hefur þegar hlotið töluverða gagnrýni.

Frétt af mbl.is

Hörð lína Norðmanna gagnrýnd á Írlandi

Uppfært 02.06.21 klukkan 09:00. Áður stóð að ESB hefði gefið út makrílkvóta sem nam rúm 100 þúsund tonn, en rétt er að um er að ræða 200 þúsund tonn. Fréttin hefur verið leiðrétt með tilliti til þess.

Tengdar fréttir

Makrílveiðar

130 þúsund tonna upphafskvóti í makríl

• Fá að færa 25% makrílkvótans á næsta ár
• Eining um heildarkvóta en ekki skiptingu
• Leggur til 22% lækkun á makrílveiðum
• Útbreiðsla makríls í íslenskri landhelgi ein sú minnsta

» Fleiri tengdar fréttir

• Blogga um frétt