Afla fyrir 8,8 milljarða landað í Grindavík

Heildarverðmæti afla sem landað hefur verið í Grindavík frá áramótum nemur 8,8 milljörðum króna og hefur á tímabilinu verið landað rúmlega 30 þúsund tonnum í 1.485 löndunum, að því er fram kemur á vef Gríndavíkurhafnar.

Í maí var landað 7.190 tonnum í Grindavík í 453 löndunum. Af þeim 59 skipum sem lönduðu í Grindavíkurhöfn í maí er það Bylgja VE sem landaði mestum afla eða 603 tonnum í níu löndunum.

Á eftir Bylgju fylgir Sturla GK með tæp 507 tonn í níu löndunum, svo kemur Vörður ÞH með 485 tonn í sex löndunum. Þétt á eftir er Áskell ÞH með 484 tonn í sex löndunum og síðan Jóhanna Gísladóttir GK með 416 tonn í fimm löndunum. Aðrir voru með minna en 400 tonn.

• Blogga um frétt