Samherji ekki gert „hreint fyrir sínum dyrum“

„Það er ákaflega dapurt, svo ekki sé sterkara að orði kveðið, að horfa upp á þessa stöðu sem hefur byggst upp í kringum þetta ágæta fyrirtæki [Samherja]. Ég sagði það strax þegar þetta mál hófst að forsvarsmenn þess yrðu að ganga fram fyrir skjöldu og greina þessa stöðu og gera hreint fyrir sínum dyrum. Ég held að flestir sem fylgjast með þessari umræðu geti verið sammála um að það hafi fyrirtækinu ekki tekist enn þann dag í dag.“

Þetta segir Kristján Þór Júlíusson, sjávarútvegs- og landbúnaðarráðherra, um þjóðfélagsumræðuna sem skapast hefur í kringum Samherja í viðtali sem birt er í sjávarútvegsblaðinu 200 mílum sem fylgir Morgunblaðinu í dag.

Um þá gagnrýni sem hann hefur sjálfur orðið fyrir í tengslum við mál útgerðarinnar segir Kristján: „Ég hef í þessari umræðu verið samsamaður viðbrögðum fyrirtækisins við þessu máli. Í pólitík er ekkert spurt um hvort það sé sanngjarnt eða ekki, en ég hef frá fyrsta degi lagt mig fram um að svara þeim spurningum sem að mér hefur verið beint.“

Þá segir ráðherrann vont að umræðan um Samherja smiti út frá sér og hafi áhrif á tiltrú til sjávarútvegsins í heild sinni.