Allir kranar Eimskips nú rafknúnir

Gámakranarnir Stormur og Grettir á hafnarsvæði Eimskips í Reykjavík hafa verið rafvæddir og nýta því ekki lengur jarðefnaeldsneyti eins og áður var. Með þessu eru allir kranarnir á hafnarsvæði fyrirtækisins – Jakinn, Grettir, Stormur og Straumur – nú rafknúnir.

Fram kemur á vef Eimskips að það hafi verið töluvert verk að breyta tæknibúnaði krananna þannig að þeir gætu orðið rafknúnir og komu bæði starfsmenn rafmagns- og vélarverkstæðis félagsins auk erlendra samstarfsaðila að verkinu. Verkefnið er sagt liður í stefnu Eimskips um að draga úr losun gróðurhúsalofttegunda.

„Þetta er jákvætt skref í rétta átt á sjálfbærnivegferð Eimskips. Við leggjum mikla áherslu á að þekkja þær áhættur sem snúa að sjálfbærni í rekstrinum okkar og vinnum markvisst að því að draga úr þeim. Ekki aðeins færumst við nær markmiði okkar að draga úr kolefnisfótspori Eimskips um 40% fyrir árið 2030 heldur hefur þessi breyting jákvæð áhrif á aðra þætti í starfsemi okkar eins og staðbundna loftmengun frá starfseminni og hljóðvist,“ segir Vilhelm Már Þorsteinsson, forstjóri Eimskips.

• Blogga um frétt